Heim & Skúli

SSS-ítrottardagur 2022

Endiliga ber alt til aftur. Í ár vóru vit vertir fyri árliga ítrottardegnum í sss høpi. Tað er samstarvið millum Smáu Skúlarnar í Suðurstreymi, sum eru skúlarnir í Kaldbak, Velbastað og Nólsoy.

Allir skúlar høvdu minst eitt ítrottartiltak við. Vit høvdu stúltur og gummistyvlakast á okkara posti, Nólsoyingar spældu leiðipikk og maskimaskina og Velbastaðarskúla hevði posarenning, eggjastafett og rísposastafett.

Okkara næmingar vóru deildir í trý hold - øll, sum gingu í 1.-2. flokki vóru saman, 3. og 4. vóru saman og 5.-7. flokkur vóru saman - 20-22 næmingar í hvørjum bólki.

Vit vóru heppin við veðrinum. Øll vóru væl við og vit í Kaldbaks skúla, altso lærararnir, vóru stolt av okkara næmingum, sum tóku væl ímóti gestunum frá hinum skúlunum.

Eitt sindur av fríløtu var til frítt spæl og tað var stuttligt at síggja øll hesi børnini spæla saman bæði á vøllinum, í skúlagarðinum og ikki minst á spæliplássinum. Áðrenn vit endaðu dagin fingu vit ein sunlollyís í part.

Vit gleða okkum longu til næsta ár, tá Nólsoyar skúli er vertur fyri árligu skúlarenningini.